صيفْ حَوْمْتي بارَدْ !
وعْيونْ الناسْ مخْطوفَة
تَفْضَحْ عْقَلْ شاردْ !!
العْيالْ كَبْرَتٌ فْغَفْلَة،
تَخْرَجْ بْلا شْوارْ
وفَالزَّنْقة تَمْشي فَحْمى كَافْلَة.
تَلْغي بَلْغى لُغْةْ الهاوْسْ
ما بْقاتْ بَغا
حْكاياتْ سَيفْ لُنْجة
ولا رُسوم مِيكي ماوْسْ !!
هَذْ لِيًّامْ،
الزمان رْجَعْ بِيَ اللُّورْ
يْذَكَّرْني بالدْروبْ مَلِّي كانت
تَعْبَقْ فيها ريحْةْ البْخور،
فْكُلْ مَرَّة القابْلَة تْقَطَّعْ حَبْلْ السُّرَّة،
لْمَوْلودْ سابَعْ يَفْتَحْ الطريق
لْثامَنْ وتاسَعْ
وبَابْ الخِيرْ ما يْضيقْ !!
الرّْزْقْ عْلى الله
كْلامْ يْفَرَّجْ كُلْ حَسْرَة؛
سَرْوالْ يْلَبْسُو مُوسى وسْعيدْ،
وُبْنَمْرَة زايْدَة
تَّشْرى كِسْوَةْ الْعِيدْ !!
نَفْتَحْ أَلْبومْ صُوَّرْ بْكْحَلْ وُابْيَضْ
تْحَرَّكْ فِيَ لْوَانْ مَحْفوظَة فْالْبالْ،
تْفَكَّرْني فْناسْ الْحَوْمَة
اللِّي مَا كَانوا يْرْضاوْ بْأَرْمَلَة وْهَجَّالَة
يْمَدُّو يَدُّومْ بْذُلْ السُّؤالْ !!
حَوْمْتِي الْيُومْ ضِيْقَة
بْشْوَارَعْ سَكْنُوهَا الْفَرَّاشَة،
بْدْيُورْ صْنادَقْ تَقْهَرْ النَّفْسْ
وتْخَلٍي الْوْجَهْ ما فيهْ بْشاشَة،
بْقْهَاوي زاجْها مْظَلَّمْ يَكْشَفْ
عْلَى بْناتِي فْعِزْ سِنّْهُمْ
يْزَنْدُو الْفْوِيخْراتْ
وْيْغَرْغْرو الْمْعَسَّلْ
فْاحْضانْ الشِّياشَة !!
بْغيتْ نَرْجَعْ لْحَوْمتِي الْقْدِيمَة
نْتْفَكَّرْ فِيها صُورْةْ الْمْوِيمَة،
تْدَسْ فْجِيبِي كِيكَسْ دْلْمَاكِينَة
يْتْفَتَّتْ طْرافْ
نْدَوَّقْ مَنُّومْ الْحُسِين وْسَكِينَة؛
فْأيَّامْ الْعِيدْ تْعْبَقْ فْالدَّارْ
رِيحْةْ حَبًّةْ حْلاوَة وْ مَازْهَرْ ،
فْحْيُوطْ الزَّنْقَة الْجِيرْ وْالنِّيلَة
يْرَسْمُو وَقْفَة تَبْهَجْ النْظَرْ،
نَاسْ الْحَوْمَة صْبَاحْ الْعيدْ
يْفْتْحُو صَفْحَة لْعَامْ جْدِيدْ،
يَنَايِرْ فْالْعُرْفْ مَا لِيهْ مَعْنَى،
الْمْوَاسَمْ شْريعْةْ النَّاسْ
بِهَا تْحَرّْكْ الأسْواقْ
تْدُورْ النَّاعُورَة
تْدْفَا الْجْيُوبْ بْالْقْلِيلْ
و النَّاس مَا يْهَمْهَا
غِيرْ الْعَيْشْ مْسْتُورَة !!
مصطفى الستيتو
مرتيل: 24 ماي 2022
